To już II diktand godki ślōnskij dlo szkołōw pōnadgimnazjalnych we Rudzie Slōnskej 🙂
Dzisioj 12 czyrwnio ô 10:00 dopołednia w Zespole Szkołōw Ôgōlnokształcōncych nr 3 p.m. Jana Pawła II we Rudzie Ślōnskej Kochlowicach, ôdbył sie II Rudzki Diktand dlo szkołōw pōnadgimnazyjalnych. We tym roku Urzōnd Miasta w Rudzie Ślōnskej niy chciał edukacyji regijōnalnyj we tym mieście. Patrōnat nad dyktandem ôbiyło stowarzyszyni Dymokratyczno Unijo Regijōnalistōw Ślōnskich a ZSO nr 3 pm. Jana Pawła II w Rudzie Ślōnskej. Diktand mōg sie ôdbyć dziynki spōnsorōm ojroposłowi Łukasz Kohut, kery ufundowoł wycieczki do Brukseli, właścicielowi firmy Callistoshop a zarazym radnymu miasta Marek Szymański, kery ufōndowoł geszynki, a Danielowi Daniel Magalski ,kery ufōndowoł kołocze. Trza dodać , co dyktand mōg sie ôdbyć dziynki tytanicznymu zaangażowaniu koôrdynatorki projekta „ZE ŚLŌNSKYM W PUKELTASZY”, pani Anna Rzepka
Gościem diktanda bōł tyż radny ze ŚPR ( Ślōnsko Partyjo Regijonalno) Roman Kubica, kery doł drobne geszynki dlo trzech piyrszych placōw.
We Diktandzie bôło 26 szkolorzy z 5 rudzkich szkołōw pōnadgimnazyjalnych .
Treść diktanda zrychtowoł zespōł: dr Artur Czesak, Alojzy Zimończyk, Stanisław Neblik, Józef Porwoł, na podstawie ôpowiadanio Elżbiety Grymel
Treść dyktanda z niezwykłōm dykcjōm i zaangażowaniym przeczytoł dr Henryk Mercik.
„Boczōnie na Hulokach”
Na zicher już pora razy jechaliście autym na Ustrōnie bez Żory. Kejś wyglōndało to cołkym inakszy. To były jedne wielge barzoły, kere sie mianowały Huloki. Krōm tego były tam take stowki, kere cołkym trzcina a tator zarostowały. Kożdy rok na pryńci a ściyl sie jich wyrzinało. Bez cołki lato na Hulokach szło potkać tako myńszo zorta dziwokich kaczek, co majōm rade płytko a letno woda. Dyć nojpiyknij bōło tam zowdy pod kōniec siyrpnia, abo pora tydni niyskorzij, kej nasze boczōnie rychtowały sie do Afryki. Wteda na Hulokach dycki bez pora dni było durch bioło, tela sie ich tam slatowało! Ci, co tam bliżyj miyszkali, niy poradziyli sie nadziwować, co te ptoki wyprowiały: debatowały, klekotały, szkubały sie, czasym sie poprały, aże piyrze leciało, a przed samym ôdlotym robiyły sōnd. Jak bōł miyndzy nimi jaki boroczek, coby do tyj Afryki niy dolecioł, to go zaroz dziōbały i chciały ôdgōnić. Nikedy takego ptoka ludzie uretowali i zima u nich przesiedzioł we chlywku przi kurach, a na wiosna już nikaj sie niy wybiyroł, yno ôstowoł na lato! Kejś Lyjna, co miyszkała wele Hulokōw, prziniōsła dō nos, do dōm modego boczōnia, co bōł fest poharatany. Jedne krzidło mioł połōmane, ale to mōj tatulek poradziyli sprawić. Dziynki starce za pora dni boczōń już po placu łaziōł, chocioż troszka kulwitoł. Niy szło rozeznać, eli to bōł boczōń abo boczōńka. We kwiytniu zaczōn rychtować gniozdo na takij staryj wiyrzbie, co na kraju Hulokōw rosła. Potym se znod kamrata, a mode wysiedzioł. Dyć na podzim prziszoł nazod ku starce Lyjnie. Dziepiyro na trzeci rok sie do tych ciepłych krajōw zabroł, isto bōł już zdrowszy, ale kożdy rok na swoja wiyrzba przilatowoł nazod. Dzisioj na Hulokach je Muzeum Ôgnia, hotel, tanksztela i pora sklepōw, a ô boczōniach już żodyn niy pamiynto.
Jury w składzie dr Artur Czesak, Grażyna Jarząbek, Jôzef Porwoł a rechtory wszyjskich szkołōw, kerzy brali udział we diktandzie.
Puchar Prezesa DURŚ i piyrszy plac dostała Patrycja Bury ZSP nr 2
Pozostałe place
II plac Kamila Brzezina ZSO nr 3
III plac Patryk Obarski ZSP nr 2
IV plac Justyna Walenciak ZSP nr 5
V plac Natalia Darda ZSP nr 1
VI plac Kinga Kinder ZSP nr 2
VII plac Weronika Jarczyk ZSO nr 3
VIII plac Magdalena Andruch ZSP nr 2
IX plac Aleksandra Lacheta ZSP nr 1
